Fréttamaðurinn Haukur Holm er að byrja með fastan fréttatíma á útvarpsstöðinni Kananum frá og með 1. mars, en Haukur er bundinn 365 fram að þeim tíma. Nýja starfið leggst vel í Hauk sem segir að stefnan sé að byrja smátt og byggja svo smám saman ofan á það. Áætlað sé að efna til samstarfs við fréttastofur með tímanum.

Aðspurður um hvaða stefnu fréttir á Kananum muni taka, segir Haukur: „Við verðum ábyrg og alvarleg svo það sé hægt að trúa okkur, en við ætlum að reyna að vera lifandi og ekki þunglamaleg.“

Til að byrja með verður fréttatími á Kananum á klukkustundarfresti frá klukkan sjö á morgnana til hádegis.