Ökumenn og aðrir vegfarendur í miðborg Moskvu trúðu vart sínum eigin augum á dögunum þegar ansi svæsin klámmynd birtist á rafknúnu auglýsingaskilti við fjölfarna götu í borginni. Mynduðust töluverðar umferðartafir vegna þessa en myndskeiðið stóð yfir í um tvær mínútur.

Fjölmargir vegfarendur tóku ljósmyndir og stöldruðu forvitnir við. Forsvarsmenn fyrirtækisins 3 Stars, sem rekur og á skiltið, segja að líklega hafi óprúttinn einstaklingur hakkað sig inn í tölvubúnað fyrirtækisins með fyrrgreindum afleiðingum.

Það er þó kannski bót í máli að komið var fram yfir miðnætti þegar myndbandið birtist á skjánum. Lögregla rannsakar málið.