„Ég átti ekki von á dauða mínum við að versla þarna MMS, þaðan af síður átti ég von á því að reyna að drepa mömmu mína með þessu,“ segir kona sem hafði samband við DV.is í kjölfar frétta í morgun af kraftaverkalausninni MMS (Miracle Mineral Solution). Eitrunardeild Landspítalans varaði í morgun við lausninni þar sem hún getur valdið alvarlegum veikindum eða dauða.

„Mér var bent á að taka þetta þar sem ég var alltaf þreytt. Ég tók þetta inn í nokkrar vikur en hætti því sem betur fer fljótlega,“ segir konan. Í tilkynningu frá Eitrunardeild Landspítalans kom fram að hægt væri að kaupa blönduna á netinu. Konan, sem hafði samband við DV.is, segist hinsvegar hafa keypt blönduna í heilsubúð í miðborg Reykjavíkur. Henni var skiljanlega verulega brugðið þegar hún las fréttina í morgun enda segir hún að fólk eigi að geta treyst því sem keypt er í verslunum hér á landi.

„Maður á von á því að það sem selt er í slíkum búðum sé öruggt. Mér var bent á að þetta væri algjör snilld og losaði líkamann við spilliefni og væri gott gegn þreytu. Þessu skúbbaði ég í mig í nokkrar vikur og benti svo móður minni á þetta sem er með mikið ofnæmi,“ segir konan. Hún lét því móður sína hafa flöskuna – enda óraði hana ekki fyrir skaðlegum áhrifum efnisins.

„Þetta fór mjög illa í hana þannig að hún hætti sem betur fer,“ segir konan og bætir við að móðir hennar hafi átt við nýrnavandamál að stríða. Í tilkynningunni í morgun kom fram að í lausninni sé 28 prósent natríum klórít. Það sé eitur sem getið valdið skemmdum á rauðum blóðkornum og nýrnabilun.

„Af því að það kemur fram að það er hægt að kaupa þetta á netinu þá vildi ég koma því á framfæri að það er einnig hægt að kaupa þetta í heilsubúð. Mér er mjög brugðið og ég er reið yfir þessu,“ segir hún.