Lögreglan á höfuðborgarsvæðinu handtók par um þrítugt fyrir utan gistiheimili í austurbæ Reykjavíkur um tvö leytið í dag. Parið fór inn í anddyri gistiheimilisins og stal þar ýmsum munum úr farangri ferðamanna.

Þá reyndi fólkið einnig að fela hluta af farangrinum á gistiheimilinu. Er talið að þjófarnir hafi ætlað að vitja farangursins síðar.

Að sögn lögreglu sást til parsins og var í kjölfarið beðið um aðstoð lögreglu sem handtók fólkið. Það dvelur nú í fangageymslum lögreglu og verður yfirheyrt síðar í dag.