Landssamband sjálfstæðiskvenna (LS) ætlar að beita sér fyrir að samþykkt verði jafnréttisstefna innan Sjálfstæðisflokksins sem fylgt verður í öllum störfum hans. „ Það er lágmarkskrafa LS að efstu sæti framboðslista flokksins verði jafnt skipuð konum og körlum,“ segir í samþykkt sambandsins frá landsþingi þess sem haldið var um helgina í Stykkishólmi.

Þar var einnig samþykkt ályktun þar sem LS fagnar framgögnu þingflokks Sjálfstæðisflokksins í Icesave-málinu og þeim fyrirvörum sem samþykktir voru við óviðunandi frumvarp ríkisstjórnarinnar frá því í sumar.

Landssambandið leggur einnig áherslu á að Alþingi sýni viðlíka samstöðu í því erfiða verki sem framundan er við fjárlagagerð. LS telur að svigrúm sé til niðurskurðar í ríkisfjármálunum og að forðast verði skattahækkanir í lengstu lög enda þoli heimilin í landinu ekki frekari álögur. Í ályktun Landssambandsins er fólk minnt á að huga að nærumhverfi sínu og nágrönnum í þeim erfiðleikum sem margir glíma við.

Á landsþinginu var kjörin ný stjórn og Drífa Hjartardóttir, fyrrverandi þingmaður, endurkjörinn formaður Landssambands sjálfstæðiskvenna.