Jón Daníelsson, prófessor í fjármálum við London School of Economics, er bjartsýnn á að Íslendingum takist að vinna sig upp úr efnahagslegu skipbroti á næstu misserum og telur að botninum verði náð í byrjun næsta árs.

Jón var gestur Egils Helgasonar í Silfri Egils í Ríkissjónvarpinu fyrir stundu.

Þar sagði Jón skilning erlendra fjárfesta á stöðu Íslands vera að aukast, og þar með traust á Íslandi. Því samfara sé efi um að Alþjóðagjaldeyrissjóðurinn sé nauðsynlegur til að aðstoða Íslendinga við að ná sér á rétt strik.

Steingrímur J. Sigfússon fjármálaráðherra var harðorður í garð AGS áður en hann komst í ríkisstjórn og krafðist þess meðal annars að síðasta ríkisstjórn myndi skila láninu sem sjóðurinn veitir okkur. Viðhorf Steingríms í garð sjóðsins hefur þó heldur mildast eftir að hann settist á ráðherrastól.