Fimmtugur karlmaður skaut fyrrverandi eiginkonu sína, son sinn og tveggja ára barnabarn sitt til bana nærri bænum Holden í sveitum Louisiana-ríkis í gær. Auk þess særði maðurinn ólétta tengdadóttur sína lífshættulega en hann svipti sig lífi þegar lögreglan veitti honum eftirför á bíl sínum.

Ekki liggur fyrir hvað lá að baki árásinni. Lögreglan var kölluð að húsinu klukkan hálf ellefu í gærmorgun og fundust þar þrjú lík. Tengdadóttir mannsins var með lífsmarki og var hún flutt á sjúkrahús lífshættulega slösuð. Lögregla fann bifreið mannsins um tuttugu mínútum eftir að hringt var á lögreglu.

Þegar lögregla gaf manninum merki um að stöðva skaut hann sig til bana.