Ökumaður bílaleigubíls missti stjórn á bifreiðinni í Arnarfirði í dag, rétt sunnan við Mjólká, með þeim afleiðingum að hún valt utan vegar. Að sögn lögreglunnar á Ísafirði voru tveir í bílnum en um var að ræða erlenda ferðamenn.

Svo virðist sem ökumaður hafi misst bifreiðina út í lausamöl með þeim afleiðingum að hann missti stjórn á henni. Að sögn lögreglu slapp ökumaðurinn og farþeginn með minniháttar meiðsl en töluverðar skemmdir urðu á bílnum. Er þetta þriðja bílveltan á hálfum mánuði sem verður í firðinum.