Jónas Ingi Ragnarsson og Tindur Jónsson voru í Héraðsdómi Reykjavíkur í dag dæmdir í tíu og átta ára fangelsi fyrir að hafa staðið saman að fíkniefnaframleiðslu. Þá var Jónas dæmdur fyrir vörslu á rúmlega 18 kg af kannabis og tæp 693 grömm af amfetamíni.

Jónas og Tindur voru handteknir í tengslum við amfetamínframleiðslu sem upprætt var í Hafnafirði á síðasta ári.

Báðir eru þekktir glæpamenn en Jónas Ingi varð frægur þegar hann var dæmdur fyrir þátt sinn í líkfundarmálinu svokallaða árið 2003 en Tindur var dæmdur fyrir stórhættulega sveðjuárás árið 2005.

Tindur hafði afplánað helming af dómi sínum þegar hann var handtekinn og hnepptur í gæsluvarðhald vegna amfetamínframleiðslunnar.

Europol sagði framleiðsluna eina þá fullkomnustu í Evrópu.