„Við höfum auðvitað sé fleiri stjórnmálamenn fara þennan veginn og verða ritstjórar. Hinsvegar veltir maður auðvitað fyrir sér tilganginum og trúverðugleika fjölmiðla á allt slíkt. Þeir hljóta auðvitað að vera metnir út frá því hver stýrir og á. Þetta hlýtur að hafa áhrif á ásýnd viðkomandi fjölmiðils,“ segir Katrín Jakobsdóttir menntamálaráðherra um ráðningu Davíðs Oddssonar í stól ritstjóra Morgunblaðsins.

Þetta sagði Katrín í hádegisfréttum Ríkisútvarpsins.

Aðspurð hvort hún teldi að annnarleg sjónvarmið lægju að baki ráðningu Davíðs sagði Katrín: „Ég veit ekki hvað kalla skal annarleg sjónarmið. En það liggur auðvitað fyrir að þarna er ritstjóri með mjög ákveðnar skoðanir sem vafalaust hljóta að setja mark sitt á fjölmiðilinn í kjölfarið.“

Ennfremur sagði Katrín að nú væru í smíðum ný lög um fjölmiðla þar sem tekið verður á hlutum eins og ritstjórnarlegu sjálfstæðu og fleiru. „Það er mikilvægt að tryggja öruggt starfsumhverfi fjölmiðla og hvaða persónur eru þar í hlutverkum.“