„Framundan er mesti niðurskurður sem sögur fara af í vestrænu þjóðfélagi í ríkisfjármálum, ekki í eitt ár heldur þrjú til fimm ár,“ segir Jón Baldvin Hannibalsson fyrrverandi ráðherra og formaður Alþýðuflokksins.
Hann segir að Jóhanna Sigurðardóttir verði sjálf að leggja fram áætlun þar sem ekki sé aðeins tekið á
heilbrigðismálum, menntamálum og félagsmálum heldur líka málefnum öryrkja og aldraðra. Enginn sé undanskilinn, allir þurfa að bera byrðarnar.

„Jóhanna þarf í fyrsta lagi að sannfæra þjóðina um að niðurskurðurinn sé óhjákvæmilegur. Í öðru lagi að sannfæra þá sem eiga að bera byrðarnar um að þeim sé réttlátalega útdeilt. Og í þriðja lagi þarf hún að sannfæra fólk um að þetta muni skila árangri. Til þess þarf innblásinn málflutning sem byggist á því að hafa yfirsýn yfir þjóðfélagi allt. Þess utan alþjóðleg tengsl, því forsætisráðherra þarf að gera tvennt; sannfæra sína þjóð til þess að hún rísi undir byrðunum og að ná samningum við alþjóðasamfélagið um aðstoð og hjálp.
Þarna liggur veikleiki Jóhönnu. Nú hefur hún verið gerð að þjóðarleiðtoga þar sem verkefnið er ekki að gefa gjafir heldur að útdeila byrðum.“

Rætt er við Jón Baldvin og fleiri um vaxandi vandamál forsætisráðherra í helgarblaði DV.