Þátttakendur í búlgarska lottóinu ráku margir upp stór augu þegar þeir sáu lottótölurnar í útdrætti vikunnar. Um var að ræða nákvæmlega sömu tölur og komu upp úr pottinum vikuna þar á undan.

Forsvarsmenn lottósins segja að um ótrúlega tilviljun hafi verið að ræða. Ekki eru allir þó á sama máli og vilja einhverjir meina að um svindl hafi verið að ræða. Það er svo sem ekki óeðlilegt að menn spyrji sig að því, í ljósi þess að líkurnar á því að slíkt gerist eru einn á móti fjórum milljónum.

Nú hefur rannsókn farið fram á því hvort forsvarsmenn útdráttarins hafi haft óhreint mjöl í pokahorninu. Hún hefur engu skilað. Átján manns skiptu með sér seinni vinningnum en enginn vann í fyrra skiptið. Lukkutölurnar í þessum tveimur útdráttum voru 4, 15, 23, 24, 35 og 42.