Leikstjórinn Ragnar Bragason stendur nú í ströngu við að klippa nýjustu kvikmynd sína, Bjarnfreðarson. Eins og margir vita er myndin byggð á persónum úr sjónvarpsþáttunum Nætur-, Dag- og Fangavaktin. Ragnar er duglegur við að uppfæra stöðu sína á Facebook og á dögunum sagðist hann vera með mikinn móral þar sem hann þurfti að klippa leikara úr myndinni.

Ragnar huggaði sig við það að pláss væri fyrir leikarann í aukaefninu á DVD-útgáfunni. Varð uppi fótur og fit á Facebook-síðu leikstjórans þar sem tveir leikarar myndarinnar vildu fullvissa sig um að þeir væru ekki þeir óheppnu. Svo var ekki en Ragnar hefur þó ekki enn gefið upp hver óheppni leikarinn er.