Grískur karlmaður hefur verið handtekinn fyrir að gerast svo djarfur að rækta marijúna á miðri hraðbraut, á milli Aþenu og Þessalóníku, í Grikklandi. Hraðbrautin sem um ræðir er sú fjölfarnasta í Grikklandi og því þykir málið allt hið undarlegasta.

Þó felustaðurinn hafi eftir á að hyggja ekki þótt góður voru plönturnar búnar að vera í pottum – á svæði sem aðskilur akreinarnar – í töluverðan tíma. Þegar lögreglan gerði plönturnar upptækar kom í ljós að þær hæstu voru 180 sentímetrar á hæð en alls voru 42 plöntur gerðar upptækar.

Grikkinn uppátækjasami var svo handtekinn þegar hann hugðist sækja hluta þeirra.