Michael Edgar, 53 ára Breti, vann 250 þúsund pund, eða 50 milljónir króna, í breska lottóinu á dögunum. Það væri vart í frásögur færandi nema fyrir þær sakir að Edgar var dæmdur fyrir manndráp árið 1986 þegar hann stakk fyrrverandi eiginkonu sína til bana.

Edgar þurfti aðeins að sitja inni í þrjú ár vegna morðsins þar sem hann var sagður fullur iðrunar. Edgar er nú giftur annarri konu og eiga þau fjögur börn saman. „Ég er yfir mig ánægður. Við eigum ekki mikla peninga og þó 250 þúsund pund sé ekki gríðarleg upphæð í dag er þetta mjög ánægjulegt,“ segir hann í samtali við breska blaðið The Sun.