Guðlaugur Þór Þórðarson, þingmaður Sjálfstæðisflokksins, fagnar yfirlýsingu Jóhönnu Sigurðardóttur forsætisráðherra. Eftir ríkisstjórnarfund í dag undraðist Jóhanna viðbrögð stjórnarandstöðunnar í Icesave-málinu og sagði hún að þau kalli á endurskoðun á samskiptum ríkisstjórnarinnar við stjórnarandstöðuna.

„Þessi yfirlýsing ráðherrans er fagnaðarefni fram til þessa hefur ríkisstjórnin ekki haft samráð við stjórnarandstöðuna og forystumenn stjórnarandstöðunnar iðulega fengið fréttir í gegnum fjölmiðla áður en einstök málefni hafa verið kynnt þeim,“ segir Guðlaugur Þór á bloggsíðu sinni.

Hann segir skýrt dæmi það hafa komið fram í gær þegar stjórnarandstaðan var beðin um trúnað „á einhverju sem þegar var komið í fjölmiðla.“ Slík vinnubrögð séu í besta falli ólíðandi. „Ég lít svo á að forsætisráðherra hafi lært af reynslunni og boði nú breytt vinnubrögð,“ segir Guðlaugur.