„Komdu bara á blaðamannafundinn, þá kemstu að því,“ sagði Þór Saari við blaðamann DV.is er hann var spurður hvort þingmenn Borgarahreyfingarinnar ætla að segja sig úr hreyfingunni. Þingmenn hreyfingarinnar hafa boðað til blaðamannafundar á morgun klukkan 14. Þeir hafa síðastliðna daga íhugað hvort og þá hvernig þeir sjái sér fært að starfa með hreyfingunni við þær aðstæður sem hafa skapast innan hennar.

Í yfirlýsingunni þingmanna Borgarahreyfingarinnar kemur fram að á landsfundi hreyfingarinnar hafi verið samþykkt lög sem gangi í berhögg við uppruna, tilgang og stefnu hreyfingarinnar. Segja þau að hreyfingin hafi sprottið upp sem lýðræðisafl til höfuðs þeim hefðbundnu stjórnmálaflokkum sem fyrir voru.

Hún hafi hinsvegar tapað sjónum á ábyrgð sinni við kjósendur landsins.
Með þessum nýju lögum er staðfest ótímabær uppgjöf að mati þingmannanna þriggja gagnvart þeim nýju lýðræðislegu starfsháttum og þverpólitíska starfi sem lagt var upp með.