Kona, sem líkist poppstjörnunni Victoriu Beckham og eiginkonu knattspyrnukappans David Beckham, er talin tengjast hvarfinu á Madeleine McCann, sem hvarf frá fjölskyldu sinni í Portúgal árið 2007. Einkaspæjarar McCann-hjónanna leita nú konunnar.

Samkvæmt frétt á vefmiðli breska blaðsins The Guardian sást konan í Barcelona á Spáni nokkrum dögum eftir að Madeleine hvarf í Portúgal. Hún gaf sig á tal við breska ferðalanga, sem síðar höfðu samband við einkaspæjara hjónanna. Ekki liggur fyrir hvað fór á milli konunnar og mannanna en að sögn einkaspæjara, sem vinnur fyrir fjölskylduna, er um sterka vísbendingu að ræða.

Mynd af konunni var birt á blaðamannafundi í Lundúnum í dag.