Björgunarsveitin Dalvík var kölluð út á sjötta tímanum í dag vegna hestamanns, sem féll af baki og slasaðist, þegar hann var í hópferð hestamanna í botni Svarfaðardals.

Í tilkynningu frá Slysavarnarfélaginu Landsbjörgu kemur fram að hestamaðurinn hafi fótbrotnað og þurfti tíu björgunarsveitarmenn til að bera hann um tveggja kílómetra leið í sjúkrabíl. Maðurinn var fluttur á Heilsugæsluna á Dalvík.