Sextán ára unglingspiltur frá Malasíu fékk vægðarlausa refsingu frá kennara sínum eftir að sígaretta fannst í geymsluskáp piltsins í skólanum. Kennarinn neyddi hann til að reykja 42 sígarettur á tveimur klukkustundum.

Pilturinn, sem heitir Mohd Alif Arifin, gat ekki borðað í fimm daga eftir refsinguna að sögn frænku hans, sem hefur forræði yfir honum eftir lát foreldra hans. Hún komst að hinu rétta í málinu eftir fimm daga en þá tók hún eftir því að varir hans voru stokkbólgnar.

Málið var kært til lögreglu og hafa skólayfirvöld beðist afsökunar á framferði kennarans. Nú er boltinn hjá skólayfirvöldum sem taka munu ákvörðun um framtíð kennarans.