Karlmaður gekk berserksgang í húsnæði Innheimtustofnunar sveitarfélaga í Lágmúla í dag. Réðist maðurinn á starfsmann stofnunarinnar og þurfti starfsmaðurinn að fara á slysadeild vegna áverka sem hann hlaut. Þetta kom fram í kvöldfréttum Sjónvarpsins.

Maðurinn leitaði til stofnunarinnar vegna ótilgreindrar upphæðar, sem tekin var af vaxtabótum sem maðurinn átti að fá. Vegna skuldar var upphæðin dregin af bótunum. Lögmaður stofnunarinnar reyndi að útskýra málið fyrir manninum en það fór ekki betur en svo en maðurinn réðist á hann.

Maðurinn tilkynnti starfsfólki að næst væri förinni heitið í Fjársýslu ríkisins og var lögregla kölluð þangað. Reiðin virðist hinsvegar hafa runnið af manninum og skilaði hann sér aldrei þangað. Lögreglan leitar nú mannsins.