Fjórir fangar, sem allir dvöldu í Guantanamo-fangabúðum Bandaríkjamanna á Kúbu, hafa allir fengið starf á golfvelli á eyjunni Bermúda í Atlantshafi. Bermúda er breskt yfirráðasvæði í Atlantshafi og hefur ráðningin valdið nokkrum titringi.

Samkvæmt lögum á Bermúda má aðeins ráða útlendinga í starf ef enginn heimamaður fæst í starfið. En Wendall Brown, stjórnarformaður Port Royal golfvallarins, segir að mennirnir hafi verið ráðnir tímabundið eftir að fjórir filippseyskir starfsmenn hættu störfum fyrirvararalaust.

Brown segir að mennirnir muni vinna á vellinum, að minnsta kosti fram yfir Grand Slam-mótið þar sem margir af bestu kylfingum heims leiða saman hesta sína. Mennirnir voru allir taldir tengjast hryðjuverkasamtökum en síðar kom í ljós að mennirnir voru með hreina samvisku.