Philip og Nancy Garrido, sem sökuð eru um að hafa haldið Jaycee Lee Dugard fanginni í átján ár í bakgarði sínum, eru undir stöðugu eftirliti fangavarða og hafa verið sett í einangrun. Óttast er að aðrir fangar reyni að ráðast á þau eða að hjónin reyni sjálfsmorð.

Fangaverðir í Contra Costa-fangelsinu í Martinez í Kaliforníu, þar sem Philip er haldið, athuga klefa hans á fimmtán mínútna fresti til að tryggja að þessi fyrrum LSD-fíkill reyni ekki sjálfsmorð.

Hann fær skó með engum reimum, fær ekki að vera með belti og þarf að nota bréfþurrkur í staðinn fyrir handklæði. Philip þarf að borða máltíðir sínar með plasthnífapörum og er vaktaður af fangaverði svo hann verði sjálfum sér ekki að voða.

Philip er hleypt út í fangelsisgarðinn daglega í fylgd tveggja vopnaðra varða eftir að hinum föngunum hefur verið hleypt aftur inn.