Ríkisstjórnarflokkarnir tapa miklu fylgi samkvæmt nýjum Þjóðarpúlsi Gallup. Aðeins 44 prósent aðspurðra sögðust myndu kjósa annan hvern stjórnarflokkanna en í kosningunum í vor fengu þeir samanlagt 51,5 prósent atkvæða og því meirihluta á þingi.

Þetta kom fram í kvöldfréttum Ríkisútvarpsins. Ekki kom hins vegar fram hvert væri fylgi einstakra flokka. Hins vegar kom fram að 48 prósent sögðust styðja ríkisstjórnina og að fylgi Sjálfstæðisflokksins í borgarstjórn Reykjavíkur er komið í 38 prósent og hefur aukist mikið frá í könnun í fyrra þegar fylgi hans mældist 27 prósent.