,,Ég ætlaði ekki að fá mér hund aftur eftir að ég missti Sunnu og Mána. En það leið ekki sá dagur að Ísabella spyrði mig ekki um Sunnu og Mána. Þá ákvað ég að hún mætti ekki fara á mis við það að eiga hund,“ segir Linda Pétursdóttir, stofnandi Baðhússins og fyrrverandi Miss World, sem er orðin hundaeigandi á ný eftir tveggja ára hlé.

Nú er það hvolpurinn Stjarna sem mæðgurnar hafa eignast. Linda átti hundana Mána og Sunnu sem voru af tengundinni enghlish springer. Hún missti Mána í ágúst 2007 og Sunna fór hálfu ári seinna. Hundarnir tveir höfðu fylgt henni lengi. Máni var 12 ára og Sunna 8 ára. Þegar Linda bjó í Bandaríkjunum og Kanada fylgdu hundarnir henni vestur um haf og heim aftur.

,,Það var mikil sorg eftir að Sunna og Máni fóru. Þau höfðu fylgt mér í gleði jafnt og sorg og voru sannir vinir. Ég er með hundaveikina, enda hef ég átt hunda síðan ég eignaðist Doppu 10 ára. Ég sá ekki fyrir mér í fyrstu að nýr hundur gæti komið í stað Sunnu og Mána. Ég valdi Stjörnu sem er enskur cocker því sú tegund er minni en springerinn. Stjarna hefur frá því hún kom til okkar, þá tveggja mánaða, heillað okkur mæðgurnar og Ísabella er alsæl með nýja fjölskyldumeðliminn. Það er auðvitað ekki þannig að Stjarna fylli það skarð sem varð við brotthvarf Sunnu og Mána. Minningarnar
um þau lifa en nú er hafinn nýr kafli með nýjum hundi,“ segir Linda sem hélt þeim sið að nefna hunda sína eftir himintunglum