Kona ein gekk inn á lögreglustöð í Kaliforníu í Bandaríkjunum á dögunum og sagðist vera stúlka sem varð mannræningja að bráð fyrir átján árum síðan. Lögreglan telur að hún sé að segja satt.

Hún hefur verið látin gangast undir DNA-rannsókn og telja lögregluyfirvöld að niðurstaðan muni styðja frásögn konunnar.

Jaycee Lee Dugard hvarf sporlaust ellefu ára gömul árið 1991 fyrir utan heimili sitt við Lake Taho. Hún er talin hafa verið numin á brott af tveimur mönnum. Þeir menn hafa verið handtekin nú eftir að konan gaf sig fram.

Lögreglan í Kaliforníu hyggst halda blaðamannafund í kvöld þar sem búist er fastlega við því að staðfest verði að konan sé Jaycee Lee Dugard. Stjúpfaðir hennar, Carl Probyn, sagði í samtali við ABC-fréttastofuna í Bandaríkjunum að fjölskylda hennar sé fullviss um að konan sé sú sem hún segist vera.

„Ég hafði gefið upp alla von,“ viðurkenndi Probyn, en segir að hann hafi ólmur viljað finna þá sem frömdu verknaðinn.

Samkvæmt frétt Associated Press-fréttastofunnar var það Probyn sem horfði á stjúpdóttur sína numda á brott árið 1991.

„Hún virðist vera ómeidd. Hún talaði við eiginkonu mína og hún man ýmislegt. Ég vona að það hafi verið komið vel fram við hana í þessi átján ár,“ segir Probyn.