Laun Jóns Sigurðssonar, framkvæmdastjóra Stoða, munu lækka um 70 prósent, úr fimm milljónum króna í eina og hálfa milljón króna. Í Fréttablaðinu í dag kom fram að laun Jóns væru 9,4 milljónir á mánuði. Eiríkur Þorláksson, stjórnarformaður félagsins, segir í tilkynningu að launin séu hinsvegar fimm milljónir.

Þá kemur fram að Stoðir séu ekki í meirihlutaeigu ríkisfyrirtækja eins og fram kom í frétt Fréttablaðsins. Stjórn Stoða gerir einnig athugasemd við frétt RÚV síðastliðið mánudagskvöld, þar sem kom fram að kröfuhafar Stoða hafi með samþykkt nauðasamninga sett pottlokið kyrfilega á Stoðir og hindrað þar með skoðun á starfsháttum félagsins.

„Þetta er fjarri sanni, enda hafa nauðasamningar ekkert slíkt í för með sér. Síðastliðnar vikur hefur stjórn Stoða látið gera ítarlega skoðun og úttekt á öllu sem viðkemur rekstri og viðskiptum félagsins með tilliti til hugsanlegrar riftunar gjörninga. Niðurstaða þeirrar vinnu, sem unnin er af óháðum endurskoðendum og lögmönnum, mun liggja fyrir bráðlega,“ segir í tilkynningunni.