Allir fjórir eftirlifandi forsetar Bandaríkjanna munu slást í för með Barack Obama á laugardaginn þegar öldungardeildarþingmaðurinn Ted Kennedy verður lagður til hinstu hvílu.

George. H. W. Bush, George W. Bush, Jimmy Carter og Bill Clinton munu auk Obama verða viðstaddir athöfnina sem fram fer í Boston á laugardaginn áður en útförin verður gerð í Arlington National kirkjugarðinum skammt utan Washington.

Obama mun flytja ræða í athöfninni samkvæmt heimildum CNN-fréttastofunnar, en þeir voru miklir og góðir vinir.

Obama hefur lýst Kennedy sem einstökum leiðtoga og var hann honum mikill lærifaðir í gegnum árin. Kennedy lýsti stuðningi við Obama í forkosningum Demókrataflokksins í fyrra þegar hann atti kappi við Hillary Clinton um tilnefningu flokksins til forsetakosninganna. Kom það gríðarlega á óvart og innsiglaði í raun sigur Obama yfir Hillary.