Sölumenn klám- og ofbeldisefnis í Bretlandi geta ekki verið sóttir til saka fyrir að selja börnum undir lögaldri vörur sínar næstu þrjá mánuðina eftir að upp komst um 25 ára gamalt klúður stjórnvalda.

Bresk stjórnvöld hefðu átt að tilkynna Evrópuráðinu um tilvist myndbandalaga frá árinu 1984 (Video Recordings Act 1984) sem stjórna iðnaðinum en það gerðu það ekki.

„Því miður þýðir uppgötvunin á þessari yfirsjón það að aldarfjórðung síðar er ekki lengur hægt að framfylgja VRA-lögunum gegn einstaklingum í dómstólum Bretlands,“ segir Barbara Follett, menningar- og ferðamálaráðherra Breta um málið.

Follett segir að fólk sem verið er að sækja til saka fyrir brot á þessum lögum yrði ekki dæmt fyrr en ný lög taka gildi eftir þrjá mánuði sem er sá tími sem tekur að bera lögin undir önnur ríki Evrópusambandsins.

Í millitíðinni er því mögulegt að selja klám- og ofbeldisefni til barna undir átján ára aldri án þess að lenda í vandræðum.

Þeir sem hafa þegar verið dæmdir fyrir brot gegn þessum lögum munu þó ekki getað áfrýjað þeim.

Samkvæmt upplýsingum frá bresku myndbandasamtökunum (e. British Video Association) munu dreifingaraðilar enn leggja allt myndefni fyrir breska kvikmyndaeftirlitið til að láta flokka það og biðja meðlimi sína um að virða aldurstakmörk.