Þorsteinn Guðmundsson leikari hefur samið lag þar sem hann biðst fyrirgefningar á hinu og þessu í lífi sínu. Sérstaklega tiltekur hann það að hann lék í frægri syrpu auglýsinga fyrir KB-banka. Að vísu segist hann hafa verið eins og hálfviti við það tækifæri en tiltekur ekki hversu mikið hann fékk greitt fyrir að fá almenning til að skipta við bankann.

Þorsteinn flytur í tengslum við djúpa afsökunarbeiðni sína lag sem hann kallar Fyrirgefið og afsakið. Þar syngur hann, talar og leikur undir á gítar. Þorsteinn er landsþekktur grínisti sem hefur afkomu sína af því að koma fram og skemmta fólki. Erfitt er að átta sig á því hversu mikil alvara er að baki fyrirgefningarbeiðninni.

Hann er ekki frægasti leikarinn sem KB-banki fékk til liðs við sig á tímum góðærisins. Breski leikarinn John Cleese, sem þekktur var fyrir leik sinn í Monty Python grínseríunni, fékk formúu fjár fyrir að leika í auglýsingum bankans og hefur ekki beðist afsökunar svo vitað sé.

Fyrirgefningarbeiðni Þorsteins má sjá á bloggi hans ef slóðinni hér að neðan er fylgt.

Fyrirgefningarbeiðni til þjóðarinnar