Bandaríski leikarinn Jason Biggs varð fyrir óvenjulegri lífsreynslu á dögunum þegar Gíbraltar-api réðist á hann með kjafti og klóm. Biggs var staddur á Gíbraltar, sem tilheyrir Bretlandi, þegar apinn réðist á hann.

Að því er fram kemur á vef Telegraph varðist Biggs árás apans fimlega. Hann var í ferð með félaga sínum úr American Pie, leikaranum Eddie Kaye Thomas, í skóglendi þegar apinn lét til skarar skríða. Voru félagarnir að fagna því að tíu ár eru síðan fyrsta American Pie-myndin var frumsýnd.

Biggs slasaðist lítið en var mjög brugðið samkvæmt heimildum. Hann ákvað hinsvegar að enda fríið eftir uppákomuna og hélt heim til Bandaríkjanna.