Grímur Atlason, sveitastjóri Dalabyggðar og fyrrverandi bæjarstjóri Bolungarvíkur, tók út peningana sína hjá Kaupþingi í gær vegna lögbannsins sem bankinn fékk í gegn hjá Sýslumanninum í Reykjavík. Málið vakti strax hörð viðbrögð meðal bloggara og virtust fæstir vera á bandi Kaupþings.

"Fílabeinsturninn er ógurlegur. Skömmin er algjör. 1500 milljarðar lánaðir 10 stærstu viðskiptavinunum. Lánabókin opnuð þrátt fyrir bankaleynd. Litlu-Símamennirnir leynast víða. Ég fagna þeim. Vondandi eru þeir líka innan skilanefnda Glitnis og Landsbankans," sagði Grímur á bloggsíðu sinni í gærkvöldi.

Hann vill að þingheimur komi saman strax á morgun og setji lög sem aflétta bankaleynd. "Ég tók út peningana mína í Kaupþingi í kvöld. Stjórn bankans ætti að skammst sín!," segir Grímur, allt annað en sáttur á bloggsíðu sinni.