Veitingahúsaeigandi í Tyrklandi var skotinn til bana þegar hann reyndi að fá hóp viðskiptavina sinna til að drepa í sígarettum sem þeir höfðu kveikt sér í. Þann nítjánda júlí sl. tóku gildi ný lög sem banna reykingar á veitingahúsum í Tyrklandi.

Bannið hefur lagst misvel í Tyrki, sem eru meðal mestu reykingamanna heims. Talið er að helmingur Tyrkja á aldrinum 15 til 49 ára reyki. Eftir að eigandinn, sem hét Hidir Karayigit, reyndi að fá mennina til að drepa í brutust út slagsmál. Fór svo að hann var skotinn fjórum skotum fyrir afskiptasemina.