24 ára karlmaður varð fyrir fólskulegri líkamsárás í Vestmannaeyjum í morgun. Atvikið var tilkynnt til lögreglu klukkan tíu í morgun en þar hafði maður nefbrotnað, hlotið skurð á nef og brotna framtönn í átökum við annan mann.

Að sögn lögreglu hefur ekki tekist að hafa hendur í hári árásarmannsins en fórnarlamb árásarinnar veit hver hann er og leitar lögregla hans. Taldi árásarmaðurinn sig eiga óuppgerðar sakir við fórnarlambið. Að öðru leyti hefur dagurinn verið nokkuð rólegur, ef undan eru skilin nokkur útköll vegna minniháttar pústra.

Sól og blíða er nú í Eyjum.