Lögreglan í Orange County í Bandaríkjunum hefur borið kennsl á lík konu sem fannst í ferðatösku og hafði verið kastað í ruslagám. Hin myrta er 28 ára gömul fyrrverandi sundfatafyrirsæta sem hvarf um helgina.

Síðast sást til fórnarlambsins, Jasmine Fiore, að morgni föstudags á heimili hennar í Los Angeles. Tilkynnt var um hvarf hennar á laugardagskvöldið en það gerði 32 ára Kanadamaður sem nú er hugsanlega talinn hafa tengst hvarfinu. Hann fylgdi Fiore í samkvæmi sem þau sóttu kvöldið áður en hún hvarf.

Lögreglan telur að maðurinn Ryan Jenkins sé hugsanlega á leið til Kanda í BMW-bifreið sinni en hún leitar hans nú til að geta yfirheyrt hann. Bifreið Fiore hefur ekki enn fundist.

Lík Fiore fannst í ruslagám í borginni Buena Park í Orange County á laugardagsmorgun. Það var maður sem var að róta í gámnum í leit að flöskum og dósum sem fann líkið. Lögregluembættin í Los Angeles og Buena Park báru saman bækur sínar og fundu út að líkið var af Fiore.