Hreiðar Már Sigurðsson, fyrrverandi forstjóri Kaupþings, varð fyrir því í nótt að rauðu lakki var svett á íbúðarhús hans í Hlyngerði í Reykjavík. Þetta er í annað sinn á skömmum tíma sem heimili Hreiðars Más er atað málningu. Athafnamaðurinn Karl Wernersson vaknaði einnig við vondan draum í morgun þegar hann sá að rauðu lakki hafði verið spreyjað á íbúðarhús hans að Engihlíð.

Velflestir þeir sem kenndir eru við íslensku útrásina hafa fengið rauða málningu eða lakk á heimili sín á undanförnum vikum en ekki er vitað hverjir eru þar að verki.