Eðli sumra mála er með þeim hætti að þau fyrnast aldrei. Eitt þeirra mála er Lockerbie-málið frá 1988, en þá var flugvél Pan Am-flugfélagsins á leið frá Heathrow til New York sprengd í loft upp yfir skoska bænum Lockerbie þann 21. desember með þeim afleiðingum að allir 259 um borð fórust og ellefu manns að auki á jörðu niðri.

Í gær brugðust bandarískir ættingjar fórnarlambanna ókvæða við þeim tíðindum að hugsanlega ætti að láta lausan úr haldi Abdul Baset Ali al-Megrahi, sem dæmdur var fyrir ódæðið, en hann var dæmdur til að afplána að minnsta kosti 27 ár í fangelsi.

Í hróplegri mótsögn við reiði bandarísku ættingjanna studdu breskir ættingjar hugsanlega lausn Abduls, enda leikur í huga þeirra vafi á raunverulegri sekt hans.

Eingöngu vangaveltur
Að sögn skoskra ráðherra er „eingöngu um vangaveltur“ að ræða, en samkvæmt vefmiðli BBC byggir fyrirhuguð lausn Abduls á grundvelli samúðar en sagt er að hann þjáist af banvænu krabbameini í blöðruhálskirtli.

Ódæðið stendur enn þá upp úr sem eitt versta hryðjuverk breskrar sögu en enginn var dreginn til ábyrgðar vegna þess í tólf ár. Árið 2000 var Abdul Baset Ali al-Megrahi ákærður vegna ódæðisins og síðan sakfelldur fyrir skoskum dómstóli í Hollandi. Abdul Baset var starfsmaður leyniþjónustu Lýbíu og yfirmaður öryggismála hjá Lybian Arab-flugfélaginu.
Samkvæmt BBC er mögulegt að Abdul Baset, sem er 57 ára, verði jafnvel sleppt í næstu viku.

Hagsmunir ofar réttlæti
Susan Cohen, bandarísk kona sem missti tvítuga einkadóttur sína í tilræðinu, var ómyrk í máli vegna tíðindanna og sagði að það yrði skammarlegt ef Abdul Baset yrði sleppt úr fangelsi og að gera það á grundvelli samúðar væri „viðurstyggð“.

„Það sýnir eingöngu að olíupeningar vega þyngra en réttlæti,“ sagði Susan Cohen og bætti við að tilfinningar hennar, sem fórnarlambs, hefðu greinilega ekkert vægi.
Í sama streng tók Kathleen Flynn, sem missti son sinn í sprengjutilræðinu, í viðtali við BBC. Kathleen sagði að tilhugsunin um að „hryðjuverkamanninum“ yrði sleppt vekti með henni viðbjóð og bætti við að hann hefði ekki sýnt nokkra samúð þegar hann kom sprengjunni fyrir og hann ætti „aldrei að njóta einhverrar samúðar“.

Efasemdir um sekt
Sem fyrr segir eru uppi efasemdir um sekt Abduls Baset í Bretlandi. Pamela Dix missti bróður sinn í hryðjuverkinu og sagði að það hefði „skort á réttlæti“ til handa þeim sem misstu lífið í ódæðinu.

En Pamela Dix sagði einng að hún væri „ringluð“ vegna margra sannana sem fram komu í réttarhöldunum sem leiddu til sakfellingar Abduls og sagði í viðtali við vefmiðil Guardian að enn lægi ekki ljóst fyrir hvort Abdul væri sekur eða saklaus því réttarhöldin hefðu vakið upp fjölda spurninga sem engin svör hefðu fengist við.

Telst Skotlandi til tekna
Jim Swire missti dóttur sína í Lockerbie-hryðjuverkinu. Að hans mati yrði Skotlandi talið til tekna ef Abdul Baset Ali al-Megrahi yrði sleppt á grundvelli samúðar. „Ég er einn þeirra sem ekki trúi á sekt hans,“ sagði Swire og bætti við að því fyrr sem Abdul væri í faðmi fjölskyldu sinnar því betra.

Martin Cadman, sem missti son sinn, tók í sama streng og sagðist vona að tíðindin væru á rökum reist og hann hefði í langan tíma viljað að Abdul yrði sleppt.
„Ég álít hann saklausan og þó hann væri ekki saklaus er ég samt þeirra skoðunar að vissulega sé rétt að gera þetta [sleppa Abdul] á grundvelli samúðar,“ sagði Cadman.

Beiðni um flutning
Lýbísk stjórnvöld lögðu fram beiðni um flutning Abduls til Lýbíu í maí, innan við viku eftir að samkomulag um flutning fanga á milli Lýbíu og Bretlands var staðfest.

Nú þegar eru lýbísk stjórnvöld vel á veg komin vegna áfrýjunar vegna dómsins yfir Abdul frá 2001 og af þeim sökum verður ekki um að ræða fangaflutning í hans tilfelli því samkvæmt lögum er slíkt ekki mögulegt á meðan málarekstur er yfirstandandi.

Hins vegar er ekkert því til fyrirstöðu að flytja Abdul til Lýbíu ef um er að ræða snemmbúna lausn hans á grundvelli samúðar og myndi það engin áhrif hafa á yfirstandandi áfrýjun.

Stiklað á stóru

28. apríl 2009
Abdul áfrýjar að öðru sinni sektardómnum frá 2001.