Seðlabankinn spáir því að krónan muni styrkjast hægar og minna en gert var ráð fyrir í maí. Hina breyttu spá nú byggir bankinn á því að fyrri spá bankans reyndist röng og krónan veiktist meira en bankinn bjóst við.

Gengi krónunnar hefur lækkað um 6% á árinu til viðbótar við 45% lækkun í fyrra. Í peningamálum Seðlabankans kemur fram að útlit sé verra nú en áður. Þar kemur fram að krónan muni styrkjast nokkuð frá næsta vori og út árið, en haldast svipað næstu tvö ár þar á eftir. Árið 2012 muni ein evra kosta 160 krónur, en nú kostar hún í kringum 180 krónur. Árið 2012 verða fjögur ár í að stórfellt útstreymi fjármagns hefjist úr landinu með endurgreiðslu ríkisins á Icesave-innistæðunum, ef Alþingi samþykkir fyrirliggjandi samning við Breta og Hollendinga.

Ástæðan fyrir rangri spá Seðlabankans um gengisþróun er margþætt, að því er kemur fram í Peningamálum.

"Gengi krónunnar reyndist nokkru lægra á öðrum ársfjórðungi þessa árs en í þeirri spá sem birt var í Peningamálum í maí. Þá var gert ráð fyrir að gengi krónunnar yrði rúmlega 157 kr. gagnvart evru en reyndin varð tæplega 172 kr., sem er 8,5% lægra gengi. Í uppfærðri spá er reiknað með lægra gengi en í maí. Gert er ráð fyrir að gengi krónunnar á fjórða ársfjórðungi verði um 176 kr. gagnvart evru, sem er rúmlega 8% lægra gengi en spáð var í maí. Reiknað er með því að gengi krónunnar haldist á bilinu 157-176 kr. gagnvart evru það sem eftir lifir spátímabilsins," segir í peningamálum Seðlabankans.

"Endurskipulagning innlends fjármálakerfis hefur tafist miðað við það sem þá var lagt upp með, gjaldmiðlar flestra smáríkja hafa átt undir högg að sækja í hinni alþjóðlegu fjármálakreppu og viðskiptakjör hafa verið óhagstæð. Að auki hafa ýmsir tímabundnir þættir átt þátt í veikingu hennar, svo sem tiltölulega þungar vaxtagreiðslur til útlanda snemmsumars og árstíðarbundin aukning innflutnings í júlí. Jafnframt er útlit fyrir að afgangur á viðskiptum við útlönd á fyrri hluta ársins hafi verið heldur minni en spáð var í maí," segir enn fremur.