Sautján ára bróðir enska landsliðsmannsins Luke Young, sem leikur með Aston Villa, fannst látinn eftir að hann fór út að skemmta sér á eyjunni Krít.

Andre Young hafði farið út að skemmta sér á mánudagskvöldið sem átti að vera síðasta kvöld ferðar hans til grísku eyjarinnar. Lík hans fannst svo á byggingarsvæði ferðamannasstaðarins Malia í gærmorgun.

Í dag sendi eldri bróðir hans, knattspyrnustjarnan Luke Young, frá sér yfirlýsingu fyrir hönd fjölskyldu sinnar.

„Fjölskylda mín og ég erum eyðilögð yfir andláti yngri bróður míns Andre á Malia fyrr í þessari viku. Hann var hæfileikarík manneskja og duglegur námsmaður og þetta er gríðarleg sóun á svo efnilegri ævi,“ segir Young í yfirlýsingu sinni.

Hann biðlar til allra sem gætu haft upplýsingar um síðustu klukkustundirnar í lífi bróður síns að gefa sig fram við lögreglu.

Foreldrar Andre flugu til Krítar til að bera kennsl á lík sonar síns sem hafði farið í frí til eyjunnar ásamt tólf félögum sínum.

Hann fannst með alvarlega höfuðáverka á byggingarsvæði en vitni segja að hann hafi drukkið stíft kvöldið sem hann hvarf.