„Sendum sundurlyndisfjanda vinstri manna, sem tryggði völd Sjálfstæðisflokksins og hægri manna hér lítt rofið í hálfa öld með hörmulegum afleiðingum, út fyrir hafsauga,“ skrifar Björgvin G. Sigurðsson, þingmaður Samfylkingarinnar, í pistli sem birtist í dag á Pressan.is.

Í pistli sínum rifjar Björgin upp sigur Reykjavíkurlistans árið 1994 og segir þar fyrst hafa hrikt í stoðum valdakerfis Sjálfstæðisflokksins. Samstaða vinstri manna í einni breiðfylkingu hafi þá kostað íhaldið völdin.

Sundurlyndisfjandinn
„Á kosningavöku R-listans það kvöld hélt einn af elstu stuðningsmönnum jafnaðarstefnunnar á Íslandi eftirminnilega ræðu. Þar skoraði hann, Marías gamli frá Ísafirði, á félagshyggjufólk að senda nú sundurlyndisfjandann á haf út. Sundurlyndisfjandann sem gerði það að verkum að Ísland eitt norrænna ríkja bjó við ofríki hægri flokks í stað stöðugrar stjórnar jafnaðarmanna. Nú skyldum við stilla saman strengi til framtíðar og halda áfram á þeirri braut sem mörkuð var með sigri R-listans. Sameinuð og sundurlyndisfjandalaus geta vinstrimenn íslenskir komið íhaldinu varanlega frá völdum,“ skrifar Björgvin.

Björgvin kallar eftir samstöðu í núverandi ríkisstjórnarsamstarfi, en verulega hefur hrikt í stoðum þess undanfarna daga vegna Icesave-málsins.

Kallar eftir samstöðu
„Nú reynir á samstöðuna. Ef við glötum henni í erli erfiðra verkefna kemur það sögulega tækifæri til varanlegrar vinstri stjórnar á Íslandi ekki aftur í bráð. Ekkert má verða til þess að rjúfa samstöðu og samvinnu vinstri flokkanna og því ber okkur sem sitjum fyrir flokkana á Alþingi og berum ábyrgð á ríkistjórnarsamstarfinu að halda saman og vinna okkur í gegnum erfiðu málin sem sum eru sannarlega tröllvaxin,“ skrifar Björgvin.

Björgvin segir brýnt að vinstri-menn stilli strengina fast saman og vinni áfram að því markmiði að hér á landi vaxi upp breið hreyfing allra stjórnmálaflokkanna vinstra megin við miðjuna.

„Sendum sundurlyndisfjanda vinstri manna, sem tryggði völd Sjálfstæðisflokksins og hægri manna hér lítt rofið í hálfa öld með hörmulegum afleiðingum, út fyrir hafsauga. Treystum raðirnar og vinnum það afrek að koma þjóðinni út úr þrotum markaðshyggjunnar og inn í stöðugleika norræns velferðarþjóðfélags í fremstu röð,“ segir Björgvin G. Sigurðsson, fyrrverandi viðskiptaráðherra og núverandi þingmaður Samfylkingarinnar.