Sú leið sem lagasérfræðingurinn Lee Buchheit leggur til að Íslendingar beiti í sambandi við Icesave-samninginn hefur þegar verið reynd og var alfarið hafnað af bæði Bretum og Hollendingum. Þetta kemur fram í tilkynningu frá fjármálaráðuneytinu.

Buchheit hefur í dag tjáð sig í fjölmiðlum um að bíða eigi með að staðfesta Icesave-samninginn þar til vitað sé hvað fáist fyrir eignir Landsbankans. Buchheit fundaði með fjárlaganefnd í dag og segir í samtali við Rúv að þingið geti einfaldlega sagt að það sé ótímabært að annað hvort staðfesta eða hafna ríkisábyrgð á samning þar sem vanti upplýsingar um hversu mikið þurfi að greiða úr ríkissjóði vegna ábyrgðarinnar. Hann telur þingið geta hafnað samningnum og að Bretar geti ekki litið á það sem samningsrof þar sem alltaf hafi legið fyrir að samningurinn gæti strandað í þinginu.

Við þessum ummælum hefur verið brugðist í fjármálaráðuneytinu og í tilkynningu segir að sú leið Buchheit að bíða þar til eignir þrotabús Landsbankans séu komnar í verð hafi verið lögð til af íslensku samninganefndinni en verið alfarið hafnað af bæði Bretum og Hollendingum.

„Leið Buchheit hefur því verið reynd og reyndist ekki fær. Í staðinn var fallist á að ekki kæmi til greiðslu úr ríkissjóði á sjö ára tímabili, hvorki vegna vaxta né höfuðstóls, og gæfist þar með svigrúm til að hámarka virði eigna þrotabús Landsbankans,“ segir í tilkynningu frá ráðuneytinu.

Þar segir enn fremur að samkvæmt mati skilanefndar Landsbankans er gert ráð fyrir 83 prósenta endurheimtum af höfuðstóli en íslenska samninganefndin hefur miðað við 75 prósenta endurheimtur.