„Þetta var meðvituð ákvörðum með maka og börnum. Þetta er mjög lýðræðislegt heimili,“ segir fjölmiðlakonan Kolbrún Björnsdóttir sem stýrir útvarpsþættinum Í bítið á Bylgjunni ásamt Heimi Karlssyni. Hún á von á barni með unnusta sínum, Árna Árnasyni, en þau hafa verið í sambúð í á sjötta ár og trúlofuð í ein fimm. Árni greindi stoltur frá þessu á Facebook-síðu sinni nýlega en Kolbrún er komin rúma þrjá mánuði á leið.

Kolbrún á tvö börn fyrir og Árni eitt en í viðtali við DV árið 2008 sagðist fjölmiðlakonan glaðlynda viss um það að hún og Árni ætluðu ekki að eignast fleiri börn. „Okkur langar ekki í fleiri börn. Við fengum okkur hunda í staðinn,“ sagði Kolbrún létt á sínum tíma en ástin virðist hafa borið þá ákvörðun ofurliði á endanum.

„Það var kannski aðeins of snemmt að ákveða það eitthvað endanlega,“ segir Kolbrún en það verður svo sannarlega myndarlegt fjölskyldulífið hjá parinu þegar fjórða barnið bætist í hópinn eftir áramót.