Bankaræningi sem rændi banka vopnaður byssu í Chicago á föstudaginn bar það með sér að vera sannkallaður harðjaxl. Hvað sem því líður þá hefur bandaríska alríkislögreglan, FBI, gefið honum gælunafnið „Bangsímon bankaræninginn.“

Ástæðan fyrir því er að hinn harðsvíraði bankaræningi klæddist líka svona huggulegri peysu með flennistórri mynd af teiknimyndapersónunni víðfrægu.

FBI-lögreglumenn sendu frá sér mynd af kappanum sem náðist á öryggismyndavélar bankans í von um að almenningur gæti aðstoðað við leitina.

Bandaríska alríkislögreglan er býsna fræg við að uppnefna glæpamenn með hnyttnum nöfnum í von um að auka áhuga meðal almennings í von um að aðstoð fáist við að leysa mál.