Samtals voru 504.073 beiðnir sendar síma- og netfyrirtækjum í fyrra um að hlera símtöl og tölvupósta íbúa Bretlandseyja. Þetta jafngildir tæplega fjórtán hundruð beiðnum á dag, eða að einn af hverjum 78 fullorðnum í Bretlandi hafi verið hleraður einhvern tíma á árinu. Talan var aðeins lægri árið 2007 en er sextíu prósent hærri en árið þar á undan. Þessar upplýsingar birtast í ársskýrslu sir Pauls Kennedy, opinbers eftirlitsmanns fjarskiptahlerunar í landinu.

Svefnganga án verndar
Í skýrslunni kemur fram að flestar beiðnirnar bárust frá lögreglu en einnig sendu leyniþjónustan og bæjar- og borgarráð víðs vegar í landinu slíkar beiðnir.

Chris Huhne, talsmaður innanríkismála hjá frjálslyndum demókrötum, segir tölurnar sýna að Bretar hafi gengið í svefni inn í það sem hann kallar eftirlitsríki og að tölurnar gætu orðið til þess að íbúar í landinu misstu trú á stjórnvöldum.

„Margar þessar aðgerðir, sem framkvæmdar eru af lögreglu eða leyniþjónustunni, eru nauðsynlegar en þessi fjöldi er ógnvekjandi. Það getur ekki verið réttlætanlegt svar við vandamálunum sem við stöndum frammi fyrir í þessu landi að ríkið sé að njósna um hálfa milljón fólks á ári. Við erum búin að ganga í svefni inn í eftirlitsríki án nægrar verndar. Stjórnvöld gleyma að skáldsagan 1984 eftir George Orwell var viðvörun en ekki leiðbeining. Við erum langt frá því að búa við leynilögreglu, eins og Stasi var í Austur-Þýskalandi, en það að nauðsynlegt sé að njósna um einn af hverju 78 fullorðnum boðar ekki gott,“ segir Huhne.

1 af 31 hleraður
Sir Paul segir fjarskiptahleranir vera ómetanlegt vopn í baráttu gegn glæpum en bætti við að það væri að verða æ tæknilegra og erfiðara vegna háþróaðra starfsaðferða hryðjuverka- og glæpamanna.

Í skýrslunni kemur fram að tvær kvartanir um ólögmæta hlerun hafi verið staðfestar af dómstólum, aðeins í annað og þriðja skiptið sem slíkar kvartanir fara svo langt. Engar frekari upplýsingar eru um málin nema að gögnin sem fengust með hleruninni voru eyðilögð og bætur greiddar út í öðru málinu en ekki hinu.

Síðustu þrjú árin hafa 1,2 milljónir beiðna um hleranir borist síma- og netfyrirtækjum í Bretlandi. Jafngildir það að einn af hverjum 31 fullorðnum hafi verið hleraður. Rétt er að taka fram að upplýsingar í ársskýrslu ársins 2007 innihéldu tæplega sex hundruð villur.