Læknar hafa gefið grænt ljós á að John Demjanjuk, sem sakaður er um aðild að dauða 29 þúsund fanga í útrýmingarbúðum nasista í Seinni heimsstyrjöldinni, sé nógu heilsuhraustur til að hægt sé að rétta yfir honum.

Demanjanjuk, sem er 89 ára gamall, hefur verið í varðhaldi í Munchen í Þýskalandi síðan í mars. Þá tapaði hann dómsmáli um að fá að vera áfram í Bandaríkjunum þar sem hann hafði dvalið um langt skeið. Búist er við að formleg ákæra verði gefin út í þessum mánuði. Að mati lækna má rétta yfir honum í tveimur 90 mínútna lotum á hverjum degi.

Sonur hans, Jon Demnjanjuk yngri, sagði í tölvupósti til AP fréttastofunnar að læknar áætli að hann eigi um sextán mánuði eftir ólifaða.