„Þetta er í fyrsta skipti sem keppt er í þessari grein í mýri eftir því sem við komumst næst,“ segir Jóhann Bæring Gunnarsson einn skipuleggjenda hins árlega mýrarbolta sem fer fram um verslunarmannahelgina. Nú verður líka keppt í að karlmenn hlaupi með konur á bakinu yfir mýrlendi.

Jóhann, sem er oftar en ekki kallaður drullusokkur vegna tengsla sinna við mýrarboltann, segir að um sé að ræða sýningargrein. „Það er ekki hægt að skrá sig í þessa grein núna en hver veit hvernig þetta verður á næsta ári.“ Þegar er búið að prufukeyra greinina. „Við prófuðum þetta á þurrum velli áðan og þá datt annar keppandinn þannig að það verður spennandi að sjá hvernig gengur þegar búið er að bleyta vel í þessu.“