Sigurjón Þ. Árnason var einn þeirra sem DV valdi í flokkinn 20 stærstu útrásarvíkingarnir í helgarblaðið.

Sigurjóns Þ. Árnasonar, fyrrverandi bankastjóra Landsbankans, verður tvímælalaust einna helst minnst í Íslandssögunni sem arkitektsins að hinum alræmdu Icesave-reikningum.

Þegar Icesave-reikningarnir þóttu ganga sem best í Bretlandi sagði Sigurjón hróðugur að þeir væru „tær snilld“.

Sigurjón var ekki stórtækur í fjárfestingum á dögum góðærisins, svo vitað sé, en hann telst vera útrásarvíkingur því hann stjórnaði útrás Landsbankans í Evrópu, meðal annars með Icesave-reikningunum.

Markmið bankans var svo að mergsjúga alla markaði með Icesave-snilldinni.

Frá efnahagshruninu hefur Sigurjón unnið sem fjármálaráðgjafi og kennt fjármálaverkfræði í Háskólanum í Reykjavík. Hann hefur mikið verið í umræðunni á þeim tíma, meðal annars fyrir að láta mágkonu sína leppa fyrir sig kaup á lúxusbílnum sem hann hafði afnot af meðan hann var bankastjóri og fyrir að taka lán í eigin lífeyrissparnaði.