„Það loga enn glæður en það er ekki mikill eldur eftir í húsinu,“ segir Snorri Baldursson, aðstoðarslökkviliðsstjóri hjá Brunavörnum Árnessýslu. Eins og greint hefur verið frá gjöreyðilagðist Hótel Valhöll í eldsvoða í dag. Að sögn Snorra verður þekjan á síðasta hluta Hótel Valhallar brotin niður í kvöld til að slökkva í glæðum sem þar loga enn.

Snorri segir að það sem eftir standi verði líklega rifið niður í fyrramálið. Aðspurður hversu lengi slökkviliðið verði að störfum segir Snorri að líklega verði það að minnsta kosti fram yfir miðnætti. Fimm dælubílar slökkviliðsins eru enn á vettvangi og einn körfubíll.

Aðspurður hvort eitthvað heillegt sé að finna í rústum Hótels Valhallar segir Snorri að það sé ákaflega lítið. Þó hafi tekist að bjarga einhverjum málverkum og fólk sem var í gistingu á hótelinu hafi endurheimt eitthvað af sínum persónulegu munum.

Allar líkur eru á því að eldurinn hafi komið upp í eldhúsinu og eldurinn náð að teygja sig í háf fyrir ofan eldavél í eldhúsinu. Þaðan hafi eldurinn borist í stokkinn og í þak hússins.