Átján manns, þar á meðal tveir hermenn, létu lífið í gær þegar skotbardagi braust út milli mexíkóska hersins og glæpahóps í bænum Acapulco í gær.

Í yfirlýsingu frá varnarmálaráðuneyti landsins segir að átökin hafi byrjað þegar hermenn hugðust fylgja eftir ábendingu um fíkniefnastarfsemi.

Níu hermenn særðust í átökunum en fimm voru handteknir eftir að herinn náði tökum á ástandinu. Glæpahópurinn virðist hafa verið við öllu búinn því lagt var hald á 49 skammbyssur, tvær léttar sprengjubyssur, þrettán handsprengjur og hátt í fjögur þúsund byssukúlur.