Bandaríkjamenn íhuga nú að setja Norður Kóreu aftur á lista yfir þær þjóðir sem styðja hryðjuverk. Þetta segir Hillary Clinton utanríkisráðherra Bandaríkjanna. Ástæðan er sú að Norður Kóreumenn hafa ekki viljað hætta tilraunum sínum með langdrægar eldflaugar og kjarnorkuvopn og með því brotið alþjóðalög.

Norður Kórea var tekin af umræddum lista í október á síðasta ári eftir að stjórnvöld samþykktu að rífa niður kjarnakljúfa. Japanska sjónvarpsstöðin NTV birti í dag viðtal við Kim Jong-nam, elsta son Kim Jong-il, forseta Norður Kóreu, þar sem hann var meðal annars spurður hver yrði eftirmaður föður síns. Hann sagði að yngsti sonur forsetans yrði líklega fyrir valinu.